زمان كان في مثل شعبي بيقول: "صاحب بالين كداب وصاحب ثلاثة منافق" والحقيقة انا عمري ما كنت صاحب بالين أو تلاته عشان في الواقع دماغى كنت ديما بتسوحني في حاجات كتير ولكن بتبسيط مُخل أنا حد بحب الحكي وما بحبش حد يقاطعني وعشان كده قررت أخرج كلامي وأفكاري وتجاربي من دماغي لهنا وبعدين ناخد وندي فيها برواقة كلنا بعدها عادي.
الفكرة ببساطة إن الحياة فيها تفاصيل كتير بتتوه الواحد، وكل شوية تلاقي فكرة جديدة بتشدك وتقولك: "تعالى جربني!"، وده مش عشان إنت سريع التشتت، لكن عشان الدنيا دي فيها حاجات كتير تستاهل إننا نجربها، وانا شخص بيحب يجرب كل حاجة في الدنيا الوحش منها قبل الحلو والغلط قبل الصح مش إيماناً بمبدأ خالف تعرف ولكن مهم عشان نتأكد من شئ ما انه وحش أو غلط لازم نخوض رحلة تجربته ومش لازم حتى نوصل لآخرها بس مهم جداً تكون لنا تجربتنا الخاصة اللى بنينا عليها تصوراتنا وقناعتنا.اتمنى يعجبكوا محتوى المدونة او ما يعجبكوش عادي يعني المهم في النهاية اقدر أعبر فيه عن كل اللي في دماغي بالشكل اللي يعجبني.